പകൽ മായുമ്പോൾ

പകൽ മായുമ്പോൾ 

വിരലിനോളമായി തീരും ചുവർചിത്രവും 

തൊടിയിൽ മധുനുകരുന്നൊരു കരിവണ്ടും 

പുഴയിലെപ്പഴന്തോണിമെല്ലെയിളകിയും

നിഴൽ അനക്കം ഓളത്തിലലിയുന്നതും 

കതിരോനൊളിക്കുവാൻ കുങ്കുമംതേച്ചതും 

കണ്ടു പേടിച്ച മിഴികളുമായല്ലോ 

പകൽ പതിവായി  യാത്രപോകുന്നത് !

വഴിയിലെങ്ങോ തളർന്ന മുക്കുറ്റിതൻ 

തോഴനാം അർക്കകിരണബാഹുക്കൾ  

തടവി നാണിക്കും നാലുമണിപൂക്കളും 

കരയാതെ കാർകൂന്തലഴിച്ചിട്ടരികത്ത് 

കരളുവെന്തുലയൂതും ശിശിരമേഘങ്ങളും 

വെറുതേയീ ചുണ്ടിൽ അടയാളമായിട്ടൊര- 

ധര ചുംബനം തന്നോ പിരിയുമീ നേരത്ത് !   

ഹൃദയതന്ത്രികൾ മീട്ടുന്ന രാഗങ്ങൾ 

സിരകളിൽ തിരയുന്നതല്ലോ അനുരാഗം

പിളർന്നമാറിലും ചുരന്നു പാൽപ്പുഴ

പിടഞ്ഞുതളർന്നുതേങ്ങുന്നൊരമ്മയിൽ    

പറഞ്ഞ വാക്കുകൾ പതിഞ്ഞ നോട്ടങ്ങൾ

ഉറവയിൽ നിന്നിറ്റ കദന കാരുണ്യവും

തിരികെ നൽകുന്നു വെറുതേ പോകണ്ടല്ലോ !

ഉരുണ്ടുരുണ്ടനാദി കാലമായ് തിരിയുന്നു

വിരണ്ടു നിന്നില്ല ഇരുളിലെങ്ങുമേ   

നരകവിനോദങ്ങൾ നടനമാടുവാൻ

കായൽ പാട്ട്

കായൽ പാട്ട്

തിന്താരിത്തക തിന്താരിതക തിന്തക താരോ ...
തിന്താരിത്തക തിന്താരിതക തിന്തക താരോ ...

കൈചുണ്ടൻ വള്ളത്തിലന്നു പാമരം കെട്ടിയേ ..
കൈതപ്പുഴ കായലിലന്നു വല വിരിച്ചേ ..
കൊട്ടയോളം മീൻ കുഞ്ഞോളെ വല പിടിച്ചേ
കെട്യോളുമായി  വട്ടവല വലിച്ചേ ...

തിന്താരിത്തക തിന്താരിതക തിന്തക താരോ ...
തിന്താരിത്തക തിന്താരിതക തിന്തക താരോ ...

കൈനിറയെ കരിമീൻ കണ്ടമ്പോളോളും ചൊല്ലിയേ ..
കായ്കൾ വന്നു ഞങ്ങാളെ ളുപ്പത്തി  കൂര മേയുമേ  ..
കിളിച്ചുണ്ടൻ  മാങ്ങാതിന്ന് കൊതി തീർക്കുമേ ..
കരിവളകൾ വാങ്ങി ഇട്ട് കൈകൾ കിലുക്കുമേ ..

തിന്താരിത്തക തിന്താരിതക തിന്തക താരോ ...
തിന്താരിത്തക തിന്താരിതക തിന്തക താരോ ...

വള്ളം നിറേ മീൻ കണ്ടപ്പോ ഏനും ചൊല്യെ
കള്ളിനൊപ്പം മൂന്നാലെണ്ണം ചുട്ടു തരേണേ
ബാക്കി മതി നമുക്കങ്ങടിയിൽ കാശിനു വിക്കാൻ
വെള്ളം തേകി വള്ളോമായി പിന്നെ മെല്ലെ തിരിച്ചേ

തിന്താരിത്തക തിന്താരിതക തിന്തക താരോ ...
തിന്താരിത്തക തിന്താരിതക തിന്തക താരോ ...

കെട്യോളും ഏനും കൂടി മീൻ തിരഞ്ഞേ
കുഞ്ഞു മീൻ കുട്യോളെ ഞങ്ങ തിരികേ വിട്ടേ
കരിമീനേം പള്ളത്തിയേം  തിരിഞ്ഞിട്ടേ
പുളുന്താനേം വട്ടാനേം പിന്നെ ദൂരെ കളഞ്ഞേ ..

തിന്താരിത്തക തിന്താരിതക തിന്തക താരോ ...
തിന്താരിത്തക തിന്താരിതക തിന്തക താരോ ...

കൈതപ്പുഴ കായലിൽ മെല്ലെ നേരം പുലർന്നേ
ഏനുമെന്റെ കെട്യോളും കൂടെ വള്ളം തൊഴഞ്ഞേ
കരകാണാദൂരത്തല്ലോ വള്ളം കിടന്നേ
പാട്ടും പാടി ഞങ്ങാ വേഗത്തിൽ വള്ളം തൊഴഞ്ഞേ

തിന്താരിത്തക തിന്താരിതക തിന്തക താരോ ...
തിന്താരിത്തക തിന്താരിതക തിന്തക താരോ ...

തകിർതിയിൽ എങ്ങാട്ടൊക്കെ മാനമിരുണ്ടേ
കാറ്റടിച്ചു കായലിലാകെ ഓളം നിറഞ്ഞേ
ഏനുമെന്റെ കെട്യോളും തുഴ നീട്ടി വലിച്ചേ
കാറ്റിലാടി ആടിയുലഞ്ഞേ വള്ളോം മീനും

തിന്താരിത്തക തിന്താരിതക തിന്തക താരോ ...
തിന്താരിത്തക തിന്താരിതക തിന്തക താരോ ...

ഏനിനി ഓർക്കാൻ വയ്യേ ബാക്കി ഓരോന്നും 

ഏന്റെ ഈ ചങ്കിലിപ്പോഴും തിരവരുന്നേ 

കാറ്റിലാടിയാടി വള്ളം തിരയിൽ പെട്ടേ ..

കാത്തു കാത്തതെല്ലാം മുങ്ങീ വള്ളത്തിനൊപ്പം 

തിന്താരിത്തക തിന്താരിതക തിന്തക താരോ ...
തിന്താരിത്തക തിന്താരിതക തിന്തക താരോ ...

ഏനിനി ഓർക്കാൻ വയ്യേ വയ്യെന്റെ ദൈവേ
ഏന്റെയാകൊട്യോളങ്ങനെ കൈവിട്ടുപോയേ
കരിവള കരിമീൻ പിന്നെ കൂരേം പോയേ
ഏനിപ്പോ കരയാനിത്തിരി കണ്ണീരുമില്ലേ ..

തിന്താരിത്തക തിന്താരിതക തിന്തക താരോ ...
തിന്താരിത്തക തിന്താരിതക തിന്തക താരോ ...

 ഏനിപ്പോ.. കരയാനി...ത്തിരി ..കണ്ണീരു..വേണേ ....

ഏനിപ്പോ.. മോന്താനി...ത്തിരി ..കള്ളും .വേണേ ....

തിന്താരിത്തക തിന്താരിതക തിന്തക താരോ ...
തിന്താരിത്തക തിന്താരിതക തിന്തക താരോ ...

തിന്താരിത്തക തിന്താരിതക തിന്തക താരോ ...
തിന്താരിത്തക തിന്താരിതക തിന്തക താരോ ...

....................................................

കുത്ത്

കുത്ത്

കൊതുകെന്തിനാണ് കുത്തുന്നത്
ആന കുത്തുന്നതെപ്പോഴാണ്
നെല്ലുകുത്തുമ്പോൾ  പാട്ടുപാടണോ
കാതു കുത്തുമ്പോൾ കരയല്ലേ
ഉളികുത്തുമ്പോൾ തടി മുറിയും
ചെല്ലി കുത്തുമ്പോൾ തെങ്ങു വീഴും
തിന്നതു കുത്തുമ്പോൾ
വെറുതേ പലതും തോന്നും
ഒറ്റ കുത്തിന് എല്ലാം തീരും

ഉള്ളത്

ഉള്ളത്

ഉണ്ടമാതിരി നീ വന്നു നിന്നതെൻ
ഉണ്ടയായൊരുകണ്‍മുന്നിലല്ലയോ
ഉണ്ടതിൽപരം നൊമ്പരമെന്നുള്ളിൽ
ഉണ്ടയാലല്ലോകൊഴിയുന്നു പുഞ്ചിരി    

തേന്മാവ്

തേന്മാവ്

പൂത്തുല്ലസിച്ചു കാറ്റിൽ
നിലാത്തിരികത്തുന്നു കണ്ണിൽ

കയ്ച്ചുപുളിച്ചുണ്ണികൾമെല്ലേ
കണ്ണുകാട്ടി വിളിച്ചുകളികൂട്ടരെ

കാത്തിരിക്കുന്നോർക്കായി  
മധുരമൂട്ടാമെന്നുതേന്മാവും  

തൊട്ടാവാടി

തൊട്ടാവാടി

നാണിച്ചു വഴിയരികിൽ കിടക്കുമിവളെ
തോണ്ടാൻ, വിരലുകൾ പേടിക്കും രണ്ടാമത്
വാടിത്തളർന്നോരിലകളിൽ കാവൽസൂചികൾ
വേണ്ടാ, വെറുതേ ജീവിച്ചു പോകട്ടെയവളും   

മുഖം

മുഖം 

സമരമുറ
മുഖത്തേക്ക് നീളുമ്പോൾ
ഇഷ്ടഗാനങ്ങൾ  

മൌനം

മൌനം 

ഒന്നും മിണ്ടില്ല
നീയും ഒന്നും മിണ്ടല്ലേ
നാം മൌനത്തിലാ! 

ആശ്വാസം

ആശ്വാസം  

സമരമാണ്
ചുണ്ടുകൾ സൂക്ഷിക്കണം
കടിയും കിട്ടാം

പ്രാർത്ഥന

 പ്രാർത്ഥന 

നീയില്ലാതെയും
ജീവിക്കേണ്ടവരല്ലേ
മദ്യമേ. ലോകർ

വിട

വിട 

അറിഞ്ഞോ നീയും
നിലാവുപോലെ മാഞ്ഞ്
ഇരുട്ടാകുന്നു 

സ്വന്തം

 സ്വന്തം

മദ്യമേ നീയും
നക്ഷത്രമാകുന്നല്ലോ
സ്വന്തം  കുടിയൻ

ലഹരി

ലഹരി

കള്ളേ , ഭാഗ്യവാൻ
പഴക്കമില്ലാത്ത നീ
രംഗത്തു വീണ്ടും.

ധീരസൂത്രം

 ധീരസൂത്രം 

സൂത്രം സുധീരം
മലബാറു പൂക്കണേൽ 
ബാറുപൂട്ടണം

കിറുക്ക്

കിറുക്ക്

വലതുമന്തൻ
വരം ചോദിച്ചു പോലും
ഇടത്തേക്കാക്കൂ  

കുടുക്ക

കുടുക്ക 

അടക്കി വെച്ച
സമ്പാദ്യങ്ങൾ പുറത്ത്
കുടുക്ക പൊട്ടി

കടുക്

കടുക് 

കടുകോളം നീ
കാത്തു സൂക്ഷിക്കുന്നത്
കഴിഞ്ഞ കാലം

വള്ളംകളി

വള്ളംകളി 

വെള്ളത്തിൽ കളി
ചുറ്റും പാഞ്ഞു വീശുന്നു   
വള്ളത്തിൽ തുഴ

ചിരി

ചിരി

നർമ്മം മുറിയിൽ
തിങ്ങിഞെരിഞ്ഞുപൊട്ടി
ചിരിച്ചു നീയും

സലിം

 സലിം 

പറന്നുപോയ
അടർന്ന സൌഹൃദമേ
നീയാണ് സലിം 

മുലപ്പാൽപ്പൊടി

മുലപ്പാൽപ്പൊടി

എവിടെ കിട്ടും 
തേനും വയമ്പും ചേർത്ത
മുലപ്പാൽപ്പൊടി

കുമ്പസാരം

കുമ്പസാരം 

പാപം ചെയ്തത്
അറിയാതെയാണച്ചോ 
ഇനി ചെയ്യില്ല

ഉരുള

ഉരുള

ഉരുട്ടിയൂട്ടി
താലോലിക്കുമ്പോഴല്ലേ
ഉരുളവേണ്ടൂ 

ഉപദേശം

ഉപദേശം

ഉപദേശിക്കാം
നല്ലത് വിചാരിച്ച്
നിർബ്ബന്ധിയ്ക്കല്ലേ

നിർബ്ബന്ധം

നിർബ്ബന്ധം

ചന്ദ്രനെവേണം
കാൽപ്പന്തു കളിയ്ക്കാനാ
നിർബ്ബന്ധമാണ് 

കരുണ

കരുണ 

ഉപഗുപ്തന്റെ
ഉപദേശം കേട്ടപ്പോൾ
സമയമായി 

ഇടി

ഇടി

ഇടയ്ക്കിടയ്ക്ക്
ഇടിവെട്ടി മിന്നിയാൽ  
മഴകൊഴുക്കും

ബ്രസീൽ -2014

ബ്രസീൽ -2014 

കളിക്കളത്തിൽ
ചിതറിയ സ്വപ്നങ്ങൾ
കണ്ണുനീർപ്പുഴ 

നുണ

 നുണ

നുണഞ്ഞ തേനും
പെയ്തിറങ്ങും മഴയും 
നുണയാകില്ല 

രുചി

രുചി

അരച്ചരച്ച്
ചമ്മന്തിയാക്കിയത് 
രുചി രഹസ്യം

കൊതുക്

കൊതുക് 

തല്ലുകൊള്ളാതെ 
ചോരയൂറ്റി കൊതുക്
സൂചിയല്ലല്ലോ

ചോറ്

ചോറ് 

ഉച്ചയൂണിന്
ഇരുന്നവർ തിന്നുന്നു
ചോറുംകൂട്ടാനും

കൂന്

കൂന് 

മുതുകിലൊരു
മുഴവലുതായത്
ആമയ്ക്ക് കൂന്

ഭാവം

ഭാവം 

വിളിച്ചതല്ലേ
തിരക്കിട്ട്‌ ചെന്നപ്പോൾ
കാണാത്ത ഭാവം
 

പിണക്കം

പിണക്കം 

മനപിണക്കം
വേണ്ടത് ചെയ്യാത്തപ്പോൾ 
മൗനം മാന്യത

കൂട്ടുകാർ

കൂട്ടുകാർ 

കൂട്ടുകാരെല്ലാം
കൂട്ടുകാരാന്നറിയാൻ
ആപത്തും വേണം

ചങ്ങാതി

ചങ്ങാതി 

ചെന്നപ്പോളല്ലേ
തിരക്കാണ് ചങ്ങാതി  
കണ്ടില്ലെൻ സ്നേഹം

ചങ്ങാത്തം

ചങ്ങാത്തം 

വിളിസ്നേഹത്താൽ
ചെന്നത് കുടുംബത്താൽ
തീർന്നൂ ചങ്ങാത്തം

മഴു

മഴു
തോട്ടിൽ വീണത്
അരുകിൽനിന്ന മരം 
കരഞ്ഞു മഴു

പ്രേമലേഖനം

പ്രേമലേഖനം
കരിയിലയ്ക്ക്
മണ്ണാക്കട്ട എഴുതി
പ്രേമലേഖനം 

വിരുന്ന്

വിരുന്ന് 
പുഴക്കരയിൽ
മണൽ വിരുന്നുപോയി 
മഴപെയ്തപ്പോൾ

മഴവെള്ളം

മഴവെള്ളം 
പെയ്തമഴയും
ഒഴുകിയ വെള്ളവും
തെരുവിലായി

ചുരം

ചുരം
ചുരം കടന്നാൽ
മലക്കപ്പുറംപോകാം
കേറടാകേറ്

സമ്പത്ത്

സമ്പത്ത് 
സമ്പത്തുള്ളവർ
വാങ്ങുന്നു കണ്ടതെല്ലാം
കണക്കില്ലാതെ

ദാരിദ്രം

ദാരിദ്രം 

കോട്ടകെട്ടിയും
പൂങ്കോഴിവളർത്തിയും
തീർന്നു ദാരിദ്രം

ചെളി

ചെളി 

അശ്രദ്ധയായാൽ
വാരിഎറിഞ്ഞവനും
വീഴും ചെളിയിൽ

നികുതി

നികുതി
നിന്റെ പകുതി
ഖജനാവിൽ വെക്കണം
നാം കുതിയ്ക്കണം

ജീവിതം

ജീവിതം

നീണ്ടവഴികൾ
മോടി പിടിപ്പിക്കുമ്പോൾ
ജീവിതം തീരും

ഇല്ലാത്തത്

ഇല്ലാത്തത് 

ഇല്ലാത്തതൊന്നും
വെറുതേ ആരും തന്നെ 
പറയാറില്ല 

മദ്യനികുതി

മദ്യനികുതി 

നികുതികൂട്ടി
നോക്കിക്കോ മുക്കുടിയൻ
കഴിക്കാത്തത്

മദ്യപാനി

മദ്യപാനി 

കള്ളമില്ലല്ലോ
കഴിക്കാത്തകുടിയൻ
ബെവറീജസിൽ  

കള്ള്

കള്ള് 

കുടിക്കരുത്
കള്ളുവിൽക്കുന്നകൂട്ടർ 
ആവർത്തിക്കുന്നു

വിദേശമദ്യം

വിദേശമദ്യം

മദ്യം കഴിയ്ക്കാം
ക്യൂനിന്ന് ഖജനാവ്
നിറച്ചു മാത്രം

കിറുക്ക്

കിറുക്ക് 

കിഴക്ക് സൂര്യൻ
ഉരുട്ടിക്കയറ്റിയ
കല്ല് താഴേയ്ക്ക്

വാങ്ങുമ്പോൾ

വാങ്ങുമ്പോൾ

ആനയെ വാങ്ങാൻ 
കൊമ്പുംപല്ലും നോക്കണം
വാലും നഖവും

വില

 വില

തലമറന്ന്
വിലമലകയറി
വലഞ്ഞുപോയി

കയറിപ്പിടി

കയറിപ്പിടി

കയറിൽ പിടി
കയറിപ്പിടിക്കല്ലേ
കയറേണ്ടതാ

ഫുട്ബോൾ

ഫുട്ബോൾ

മൈതാനത്തെല്ലാം
തട്ടുകൊണ്ട് നടക്കാൻ 
ഫുട്ബോളാണോ

പെനാൾട്ടി

പെനാൾട്ടി 

ഉന്നം തെറ്റിയാൽ
കിട്ടിയ പെനാൾട്ടിയും
പോസ്റ്റിൽ പകയ്ക്കും

ഗോൾ

ഗോൾ 

നോക്കിയടിച്ചാൽ
ഗോളിയും  പിടിക്കില്ല
അടിപോളിഗോൾ

കൊടി

കൊടി

പൊടി നിറഞ്ഞ്
കൊടി മറന്നുപോയി
അതിന്റെ നിറം

പുഴു

പുഴു 

പഴുത്തപഴം
മുറിച്ചുപകുത്തപ്പോൾ  
മുറിഞ്ഞ  പുഴു

വഴി

വഴി

ഒരൊറ്റവഴി
നോക്കിയുംകണ്ടും പോയാൽ
കുഴപ്പമില്ല 

വൈകൃതം

വൈകൃതം

മുഖം മിനുക്കി
വികൃതമല്ലനന്നും
ചന്ദ്രനെ പോലെ 

ഗ്രാവിറ്റേഷൻ

ഗ്രാവിറ്റേഷൻ


എഴാം ക്ലാസ്സിൽ 
ബെഞ്ചിൽ നിന്ന് താഴെ തള്ളിയിട്ടത്‌ 
ഐസക് ന്യൂട്ടനായിരുന്നു
അതുവരെ വീണ വീഴ്ചകൾക്ക് 
സയന്റിഫിക് പരി വേഷം ഇല്ലായിരുന്നു 
ചക്കവീണുചത്ത മുയലും 
മോങ്ങാനിരുന്ന നായരുടെ തലയിൽ 
തേങ്ങാവീ ണതും 
അതിനു മുമ്പും പറഞ്ഞു ചിരിച്ചിട്ടുണ്ട് 

 മാവിലെറിഞ്ഞകല്ലും 
വെട്ടിയിട്ട തേങ്ങാക്കുലയും
താഴേയ്ക്കു തന്നെയാണ് വീണത് 
പക്ഷേ  അന്നൊന്നും ഈ മണ്ടത്തലയിൽ 
ഗ്രാവിറ്റേഷൻ ഇല്ലായിരുന്നു 
ഉണ്ടായിട്ടും കാര്യവുമില്ല 
അതിനും വളരെ മുമ്പുതന്നെ 
ആപ്പിൾ ന്യൂട്ടന്റെ തലയിൽ വീണില്ലേ ?

ഉറക്കത്തിൽ 
സ്വപ്നം കണ്ടു തുടങ്ങിയതിനു ശേഷമാണ്
ടിവി വന്നതും ദിവസവും സീരിയൽ തുടങ്ങിയതും 
പറഞ്ഞി ട്ടു കാര്യമില്ല
ഉറങ്ങാതെ സ്വപ്നം കാണാതെ
ഇരുന്നിരുന്ന് തലയിൽ
കാക്ക പോലും തൂറിയില്ല 

വയസ്സുകാലത്ത്
ഉറങ്ങാതെ  റിസേർച്ചുചെയ്യാതെ
ആപ്പിളിന്റെ ഇടപെടലില്ലാതെ
തെളിയിച്ചത്
പുതിയ റോക്കറ്റ് തിയറം
അതിങ്ങനെ പറയപ്പെടുന്നു

"ആരു ഭരിച്ചാലും
ഗ്രാവിറ്റേഷ നെതിരെ കുതിച്ചു പായുന്നത്
കൈയ്യിൽ  നിൽക്കാത്ത ചിരിയ്ക്കുന്ന  സാധനം
അതാണ്‌ അതത്രേ വില "

വീണപൂവ്‌

വീണപൂവ്‌ 

പോകയാണെന്ന്
പറയാതെ പോയൊരു
പൂമരകുഞ്ഞ്

വേഴാമ്പൽ

വേഴാമ്പൽ

മഴ വരില്ലേ
മേഘകൈകളിലൂടെ
വേഴാമ്പലല്ലോ

സ്തുതി

സ്തുതി 

എഴുതാത്തവ
പാടി നടക്കുന്നവർ
വരച്ചു വെയ്ക്കും

പൂക്കാലം

പൂക്കാലം 

വീണതെല്ലാം പൂ
പാറ്റ കൾ പറന്നല്ലോ
വയ്യ പൂക്കാലം 

കര

കര

കാർന്നുതിന്നുന്ന
കഠിനജീവികളാൽ
കരയുന്നവൾ

കടൽ

കടൽ 

ഉപ്പുതിന്നപ്പോൾ
വെള്ളം കുടിച്ചു വീർത്ത്
അലറുന്നവൾ 

ശബ്ദം

ശബ്ദം 

നിശബ്ദമായി
ഇരിയ്ക്കണമെന്നാണ്
കേൾക്കുന്നശബ്ദം

മഴ

മഴ 

കാർമേഘങ്ങളെ 
കാറ്റ് പീഡിപ്പിച്ചപ്പോൾ
കൊഴിഞ്ഞ മുത്ത് 

ദൈവം

ദൈവം 

തൂണിൽ തുരുമ്പിൽ
പുസ്തകങ്ങളിൽ പോലും
വാണരുളുന്നു

മാഷ്‌

മാഷ്‌ 

എഴുതിപ്പിച്ചു
നോക്കി വിലയിരുത്തി
വട്ടം വരച്ചു

പുക

പുക 

പുകയുന്നത്
നനഞ്ഞമുറിവുകൾ
തീ പിടിയ്ക്കാതെ

സ്വന്തം

സ്വന്തം

സ്വന്തമാണല്ലോ 
അയൽവാസികൈവെച്ച 
അണക്കെട്ടുകൾ

ലൈബ്രറി

ലൈബ്രറി 

പുസ്തകക്കൂട്ടം 
കൂട്ടിനുവായനക്കാർ  
 ഉറക്കമാണ്

വായന

വായന

വായിച്ചതെല്ലാം
പറഞ്ഞു കേൾപ്പിക്കണം
വായനാറ്റത്തിൽ

മണം

മണം 
കാറ്റത്തുവീണ
മുല്ലപ്പൂവമ്പലത്തിൽ
ചന്ദനമണം

ബോർഡ്

ബോർഡ്  
പച്ചപ്പലക
കറുകറുത്തചിന്ത
വെളുത്ത ചോക്ക്

അക്ഷരത്തെറ്റുകൾ  പ്രകാശനം  

8-6-2014 രവീന്ദ്രഭവൻ , മ ഡ്‌ ഗോവ 

താക്കോൽ

താക്കോൽ

ഭദ്രമാക്കി സൂക്ഷിക്കാൻ 

ഒരു ഭദ്രകാളി പൂട്ടിട്ട് പൂട്ടി 

താക്കോൽ തലമുറകളായി 

ഉത്തരത്തിൽ തിരുകി

താക്കോൽ ദ്വാരത്തിലൂടെ
എത്തിനോക്കിയവർ
കണ്ടതെല്ലാം
പാലായനം ചെയ്ത
പണക്കിഴികൾ

ഉറങ്ങാതെ
കോർത്തുപിടിച്ചുനിന്ന
ചങ്ങലപ്പൂട്ടുകളെ കബളിപ്പിച്ചു
മാന്ത്രികൻ
പുറത്തിറങ്ങിയത്
സ്വർണ്ണനൂൽ വസ്ത്രമുടുത്ത്
നിധി കുംഭവും എടുത്തെന്ന്
കണക്കു കൂട്ടിയവർ

താക്കോൽ
ഭദ്രമായി തന്നെ ഉത്തരത്തിൽ
നിധികാക്കുന്ന ഭൂതം
കള്ളനാണെന്ന് കണക്കൻ

ഉത്തരത്തിലെ ഗൌളി
നിർത്താതെ ചിലച്ചപ്പോൾ
തലമുറവിട്ട് താക്കോൽ
ഉള്ളങ്കയ്യിൽ മുറുകി.
  ....    ...   

ഒരു ക്വട്ടേഷൻ

ഒരു ക്വട്ടേഷൻ
..............................

ലോകത്തിലെ ലോഹങ്ങൾ
ഉരുക്കുവാനായി നല്കി
ഒരു ക്വട്ടേഷൻ

പരസ്യങ്ങൾ ഒഴിവാക്കി
രഹസ്യമായി കണ്ടെത്തിയതാണ്
കരാറുകാരനെ.

ലോഹങ്ങൾ മോഹങ്ങളാണ്
നന്നായി വലിച്ചുനീട്ടാവുന്നവ
ആഭരണങ്ങളായി ഹൃദയത്തിൽ
മുട്ടി തൂങ്ങിക്കളിയ്ക്കുന്നു
അല്ലാത്തവ
വിളക്കുകാലുകളിൽ
തീവണ്ടിപ്പാതകളിൽ
ഓടുന്ന വണ്ടികളിൽ
പലയിടങ്ങളിലായി
ജനമദ്ധ്യേ അലഞ്ഞു തിരിയുന്നു.

ആളൊഴിഞ്ഞ നേരത്ത്
കരാറുകാരൻ മുഖം കാണിച്ചു
ഉരുക്കിയ ലോഹങ്ങൾ നിറച്ച
കുഴികൾ  അയാൾ തുറന്നു
ഹൃദയംപോലെ ഉരുകിയവ
തിളച്ചു മറിഞ്ഞ് കുമിളകളായി
പൊട്ടിയൊലിക്കുന്നുണ്ടായിരുന്നു

അയാളുടെ കുഴിഞ്ഞ കണ്ണുകളിൽ
ഒരു ക്വട്ടേഷൻ കൂടി നിറഞ്ഞൊഴുകി 
ഉരുകിയ ലോഹങ്ങൾ തണുപ്പിച്ച്
ധ്രുവങ്ങളിലേക്ക്  വലിച്ചെറിയാൻ

                 .....    

മോണോറയിൽ

മോണോറയിൽ

അള്ളിപ്പിടിച്ച്  തേനെടുക്കാൻ
ആകാശത്തേക്ക് കയറുന്ന
കാട്ടുമൂപ്പനെ ഓർത്തത്‌
തലയ്ക്കുമുകളിലൂടെ
മോണോറയിൽ
പാഞ്ഞപ്പോഴായിരുന്നു 

ഒറ്റത്തടിയുള്ള മരത്തിന്റെ നെറുകയിൽ

ചായസഞ്ചി പോലെ
ഇരമ്പി പായുന്ന തേനീച്ചകൾ.
നെഞ്ചുരച്ച് കൈകാലുകളാൽ അള്ളിപ്പിടിച്ച്
ചൂളം വിളിക്കാതെ കാട്ടുമൂപ്പൻ
നിലത്തെ സ്റ്റേഷനിൽ നിന്നും യാത്രയാകുന്നു
ഒറ്റബോഗിയുള്ള ആദ്യത്തെ മോണോറയിൽ
ആകാശത്തേക്ക് പാഞ്ഞത്
കാട്ടുതേൻ എടുക്കാനായിരുന്നു


ഏറുമാടങ്ങളിൽ കയറിയിറങ്ങി
ഉയർന്ന നഗരവീഥികളിലൂടെ
വളഞ്ഞും ചെരിഞ്ഞും ഇഴയുകയാണ്
തേനുമായീ നഗരമൂപ്പൻ.

ചുറ്റിനും  ചേരികളുടെ ചെതുമ്പൽ
ലോക്കൽ ട്രെയിൻ പോലെ
മോണോറയിൽ പാഞ്ഞാൽ
തമ്പാക്കും  പാനും തിന്നുന്നവർ
പക്ഷികാഷ്ടം പോലെ
താഴെ  അടയാളങ്ങൾ തീർക്കും

തേനെടുക്കാൻ പറന്നു  കളിയ്ക്കുന്ന
തേനീച്ചകളെ പേറുന്ന കൂടുപോലെ
നഗരത്തിൻറെ  ജീവനാഡിയാകാൻ
വെറുതെ വളഞ്ഞു തിരിഞ്ഞു പായുന്നു
മുംബായ് മോണോറയിൽ
                 ------  

ലക്ഷ്യത്തിലെത്താൻ

ലക്ഷ്യത്തിലെത്താൻ

------------------------------- 

തിരക്കുള്ള ഇടങ്ങളിൽ 

ലക്ഷ്യത്തിന്  ഒരു നിരതന്നെയുണ്ടാകും 

പാഞ്ഞുപോകുന്ന ട്രയിൻ 

ലക്ഷ്യത്തിൽ എത്തിയ്ക്കുന്നത് 

നിരകളായി കൊളുത്തപ്പെട്ട 

ബോഗികളിലെ നിശ്വാസങ്ങളെയാണ്

മനുഷ്യന് മൃഗങ്ങൾ പായുമ്പോൾ 

വേഗതയുള്ളതായി തോന്നും 

പക്ഷികൾ  പറക്കുന്നതും 

അതിവേഗത്തിൽ തന്നെ  

പെട്ടെന്ന് വേഗം കൂട്ടാൻ

വേഗപ്പൂട്ടില്ലാത്ത ബസ്സിൽ കയറി

പലയിടങ്ങളിൽ നിന്ന് 

പാഞ്ഞെത്തിയവയെല്ലാം  

ഒരിടത്ത് കുടുങ്ങി 

നിരയായി നീണ്ടു കിടന്നു 


ലക്ഷ്യത്തിലെത്താൻ

വേഗനിരകടക്കണം 

ഇറങ്ങിനടന്നാൽ 

ഓടിയാൽ 

നിരയ്ക്കപ്പുറം കടക്കാം 

പറക്കാൻ കഴിഞ്ഞാൽ 

റോഡിൽ  നീളുന്ന 

യന്ത്രവേഗങ്ങളെ മറികടക്കാം 

വേഗത കൂട്ടി പായാൻ 

ഒരു പക്ഷിയായി

ലക്ഷ്യത്തിലേക്ക്  പറന്നു

  ....

കാരസ്ക്കരം

കാരസ്ക്കരം
------------------------


കാഞ്ഞിരത്തിന്റെ കുരു തുളച്ച് 
ഈർക്കിൽ കടത്തി 
കറക്കി കാണിച്ചത് 
മരം വെട്ടുകാരനായിരുന്നു 

നിർത്താതെ കറങ്ങുന്ന പമ്പരം 
വീണ്ടും വീണ്ടും ഉണ്ടാക്കി കളിച്ചപ്പോൾ  
കാഞ്ഞിരം രണ്ടുകട്ടിലായി 
ഒന്നിൽ വാതം പിടിപെട്ട വല്യച്ഛൻ 
പുക നുണഞ്ഞു കിടന്നു
മറ്റേത് പൂമുഖത്ത് അതിഥികൾക്കായി 
അലങ്കരിച്ചു നിവർത്തിയിട്ടു.

അവധി ദിവസങ്ങളിൽ
അതിഥികൾ ആരും ഇല്ലാത്തപ്പോൾ 

എണ്ണയും കുഴമ്പും പുരട്ടി 
കാഞ്ഞിരകട്ടിലിൽ മലർന്ന് കിടന്ന് 
അച്ഛൻ കുന്തിരിക്കപ്പുകകൊള്ളും  

കറക്കി വിടുന്ന പമ്പരങ്ങൾ 
അമ്മകാഞ്ഞിരത്തിന്റെ ഓരോകാലിനും 
വലത്തിട്ട് കറങ്ങിക്കറങ്ങി 
മുട്ടിയുരുമ്മി നിൽക്കും 
കുന്തിരിക്കപ്പുകയിൽ കയ്പ്പ് മറന്ന് 
അമ്മക്കട്ടിൽ ആകാശം  നോക്കി നെടുവീർപ്പിടും 

പുകകാഞ്ഞ് കുഴമ്പുപിടിപ്പിച്ച ദേഹത്ത് 
ഒറ്റതോർത്ത് മുറുക്കിയുടുക്കാൻ 
അച്ഛൻ നിവർന്നു നിന്നപ്പോൾ 
കാൽവെള്ളയിൽ ഈർക്കിൽ തുളച്ചുകയറി 
ഇർക്കിൽ ഊരി കാഞ്ഞിരക്കുരു 
മഴയിലേക്ക്  വലിച്ചെറിഞ്ഞതാണ് 
മുറ്റത്തെ കുളമാടിയിൽ 
ചിരിച്ചു നിൽക്കുന്ന കാരസ്ക്കരം 

കാറ്റ് എപ്പോഴും കയ്പിനുചുറ്റും 
പമ്പരംപോലെ 
നിലയ്ക്കാതെ കറങ്ങുന്നു
                     ...... 

എന്റേതല്ലാത്തത്

എന്റേതല്ലാത്തത് 

ഇറച്ചി വിലയ്ക്ക്

തൂക്കികൊടുക്കാൻ 

വീട്ടിൽ ജന്തുക്കളില്ലായിരുന്നു 

എങ്കിലും`

രാവിലെ കയറിവന്ന വഴിപോക്കൻ

മച്ചിപശുവിനെ അന്വേഷിച്ചു 

മുട്ടനാടിനുവില പറഞ്ഞു 

വളഞ്ഞ അങ്കവാലുള്ള പൂവൻ 

പിടചവിട്ടിയാൽ
മുട്ടകുറയും എന്നും പറഞ്ഞു

വീട് എന്റേതല്ലാഞ്ഞതിനാൽ

ഞാൻ വെറുതേ മൂളി കൊണ്ടിരുന്നു 

മുറ്റത്തെ പ്ളാവിൽ നോക്കി 

അയാൾ പറഞ്ഞു 

തായ്ത്തടി ഉണങ്ങി തുടങ്ങി 

ഇപ്പോൾ മുറിച്ചാൽ 

വിറകിനു കൊള്ളാം 

മരമെന്റേതല്ലാഞ്ഞതിനാൽ

ഞാൻ വെറുതേ അയാളെ നോക്കി

തുടർന്നയാൾ ഉമ്മറത്തെ 
കസേരയിൽ കയറിയിരുന്നു 

വീട്ടുകാരനല്ലാഞ്ഞതിനാൽ 

ഞാൻ കുശലം പറയാതെ 

പടിവാതിൽ ചാരി നിന്നു 

അയാൾ മുറുക്കാൻ ചെല്ലം തുറന്ന്  

ഉള്ളിലേക്ക് നോക്കി ഉറക്കെ ചോദിച്ചു 

ചുണ്ണാമ്പുണ്ടെങ്കിൽ ഒന്നെടുക്കണേ?

ഉള്ളിൽ  നിന്നും പാഞ്ഞെത്തിയ

നാലു വയസ്സുകാരിയെ കണ്ട് 
എന്റേതല്ലാത്ത

 വീടിന്റെ വാതിൽ 

 ഞാൻ വലിച്ചടച്ചു.

 ......      ....    

ദൈവത്തിന്റെ വികൃതികൾ

ദൈവത്തിന്റെ  വികൃതികൾ  

 ************

ഇടയ്ക്കിടയ്ക്ക് ദൈവം

മുറുക്കി തുപ്പാനായി 

പുറത്തിറങ്ങാറുണ്ട്

ചിലപ്പോൾ 

തുപ്പൽ വീഴുന്നത് 

ഭൂമിയിലെ 

ദൈവങ്ങളിലായിരിയ്ക്കും 

അഴുക്കുപുരണ്ട 

ഉടയാടകൾ

കാണുമ്പോൾ

കുളിച്ച് കുറിതൊട്ട മനുഷ്യർ 

ഉറഞ്ഞു തുള്ളാറുണ്ട്

ഇടയ്ക്കിടിക്ക് 

ദൈവം ചിരിയ്ക്കും 

കാഷായവും തൂവെള്ളയും

ദിഗമ്പരന്റെ മുന്നിൽ 

സമസ്യകൾ തീർക്കും 

ഗുരുവിൽ നിന്ന് 

വേരുകൾ അടർത്തി 

ദൈവം തെരുവിലിറങ്ങും  

ഇടയ്ക്ക് മാത്രം 

ഭൂമിയിലെ ദൈവങ്ങൾ 

മനുഷ്യരാകും 

അപ്പോൾ അറിയാതെ 

നീതിപീഠങ്ങൾ 

പൂജ മുടക്കും

ജാതിയും മതവും 
പൂജാപാത്രങ്ങളുമായി

ശ്രീകോവിലേക്ക് 

തിരിച്ചുകയറും 

......    

പൂവ്

  പൂവ്

 *******

കുടുങ്ങിയ പൂക്കളാണ് മാലയിൽ 

അറിഞ്ഞിട്ടും എടുത്തണിയുന്നു

വാടിയ  മലരുകളാണ് ഓരോന്നും 

എങ്കിലും  മണത്തുനോക്കുന്നു

"ഇതൊന്നും എന്റേതല്ലല്ലോ"

ചവറ്റിലേയ്ക്ക് വലിച്ചെറിയുന്നു

ശബ്ദിച്ചാൽ ഒറ്റപ്പെടും

ദുർഗന്ധം പേറുന്ന 

കാട്ടുപ്പൂവാണെന്ന്‌ 

വിളിച്ചു കൂവും 

എന്റെ തോട്ടത്തിലും

പൂക്കളുണ്ട്

ഇറുക്കാതെ 

കാറ്റുപോലും 

കടക്കാതെ 

സൂക്ഷിച്ചു പോരുന്നവ

ഒരു നിശ്വാസത്തിലവ 

അടഞ്ഞ ദളങ്ങളിലെ

സുഗന്ധം പരത്തുമ്പോൾ 

ഞാനും പേടിയ്ക്കുന്നു

     ...      ...     വിശ്വം

നക്ഷത്രമൊട്ടുകൾ

നക്ഷത്രമൊട്ടുകൾ 

------------------------

നക്ഷത്രചിന്തയിൽ അത്താഴമുണ്ണാതെ

ആകാശ വീഥികൾ തിരഞ്ഞ രാവിൽ

പൊട്ടുന്നനേകം പ്രകാശ പുഷ്പങ്ങൾ

പൊന്മുത്തുകൾ തുന്നിയ കമ്പളത്തിൽ

സത്യപ്രഭാവത്തിൽ ഒത്തുല്ലസിയ്ക്കുന്നല്ലോ  

ബോധതന്തുക്കളാൽ ചുറ്റുന്ന സൂര്യന്മാർ

വ്യത്യസ്ത രാശികൾ വർഷിച്ചൊരാനന്ദം

ചിത്തേനിറഞ്ഞതും താരഗണങ്ങളായ്

നിറവിന്യാസത്താൽ മായും മഹാശില

കരതീർത്ത  വിണ്ണിൻ  വിദൂര ദൃശ്യം

അതിരു മായിച്ച് കളിച്ചു ശയിയ്ക്കുന്ന

സാഗരം ഭൂമിതൻ ശ്വാസകോശം

നക്ഷത്രമെന്തേ അകന്നു നിൽക്കുന്നു

സത്യപ്രകാശം മനസ്സിൽ പരത്താതെ

മൃത്യുവിൻ  ദൃഷ്ടിയുമായൊരുരാത്രി 

കാട്ടുന്നനന്തത വിസൃത ഗഗനത്തിൻ 

അതിരുകളില്ലല്ലോ ബ്രഹ്മാണ്ഡമേ  

വിസ്മയം, വിശാലം മനചര്യയും 

നക്ഷത്ര ലോകമേ നിനക്ക് നൽകാൻ 

മൊട്ടായ് വിടരുന്നീകണ്‍കൾ രണ്ടും 

                                       .....   വിശ്വം . 

ഇടനെഞ്ചിലെത്തുന്ന നൊമ്പരം

ഇടനെഞ്ചിലെത്തുന്ന നൊമ്പരം
 ****************

ഇടനെഞ്ചിലേക്കൊരു 
തീ വന്നുവീഴുമ്പോൾ 
ഇത്തിരി വെള്ളം നൽകണം  നീ 

പ്രണയമേ പറയാതെൻ 
അരികിലുണ്ടാകണം

വെറുതേതോന്നുമീ ആഗ്രഹങ്ങൾ 

പറയുവാനല്പം 
പഴങ്കഥ കരുതണം 
കേൾക്കുമ്പോളനുഭൂതി 
നിറയുമെന്നിൽ 

ഇതൾവീണ പൂവിന്റെ 
ഓർമ്മപോൽ പടരണം 
നറുമണമെന്റെ സിരകളിൽനീ 

പിന്നിട്ട വഴികളിൽ   

പതിഞ്ഞ കാല്പാടുകൾ 

ഓരോന്നു മോർത്തോർത്തെടുക്കണം

നിന്റെ നിശ്വാസങ്ങളെൻ

ശ്വാസമായ്  തീരണം 

എന്നിലേയ്ക്കൊഴുകി നിറയണം 

പതറാതെ നില്ക്കണം 

കണ്ണീർ വീഴാതെ നോക്കണം നീ 

ചിരിയ്ക്കുന്ന മുഖമായിരിയ്ക്കണം

അധരമെൻ ചുണ്ടിലമർത്തണം

പ്രണയമധുരം പകർന്നു നല്കണം

അടയുമെൻ കണ്ണിൽ 

നിൻമുഖം തങ്ങണം 

പിരിയുന്നതെന്നേയ്ക്കുമല്ലേ

ഇടനെഞ്ചിലെത്തുന്ന നൊമ്പരം 

പ്രണയമേ, നിന്നെ 

അകലുന്ന വേദനയല്ലേ  

 .....       ... .....   

സ്വപ്നത്തിൽ

സ്വപ്നത്തിൽ 

*****

പാതിയടഞ്ഞ കണ്ണുകളിലൂടെയാണ്

ഞാൻ സ്വപ്നം കാണുന്നത്

നിങ്ങളോ?

കൊഴിഞ്ഞു വീഴുന്ന പഴങ്ങളാണ്  

ഓരോ സ്വപ്നവും 

ഞാൻ വെറുതേയവ കൂട്ടിവെയ്ക്കുന്നു

നിങ്ങളോ?

വേഗത തീരെയില്ലാത്ത കാലുകളാണ്

സ്വപ്നത്തിൽ  എനിയ്ക്ക്

നിങ്ങൾക്കോ?

എന്റെ പിന്നാലെയാണ്
സ്വപ്നത്തിൽ  എല്ലാവരും

തിരിഞ്ഞു നോക്കാൻ

എനിയ്ക്ക് പേടിയായിരുന്നു

നിങ്ങൾക്കോ?

ഒരിയ്ക്കലോടിക്കയറിയത് വലിയ 

കോട്ടയിലേക്കായിരുന്നു

നിറയെ രത്നങ്ങൾ പതിപ്പിച്ച

ചുവരുകളുള്ള ഒരു കൊട്ടാരം

നീണ്ടതാടിയുള്ള വയസ്സൻ രാജാവ്

ചുറ്റിലും സ്വർണ്ണ പൂമ്പാറ്റകൾ

സിംഹാസനത്തിലേക്കാണ് 

എന്നെയവർ പിടിച്ചിരുത്തിയത്

എനിയ്ക്കു ചുറ്റും  
ആലവട്ടവും വെഞ്ചാമരവുമായി  
പരിചാരകൾ 

ഞാൻ പറയേണ്ടതെല്ലാം 

രാജാവ് പറഞ്ഞു തീർക്കുന്നു 

പൂമ്പാറ്റകൾ ഓരോന്നായി 
രത്നചുവരുകളിൽ 

പറന്നിരിയ്ക്കുന്നു  

താടിരോമങ്ങൾ  

മുള്ളുകളായി എന്നെ പൊതിയുന്നു 

മുള്ളുകൾതീർത്ത  
ഒരു കൂട്ടിലായി ഞാൻ 

ചുറ്റും ചൂലുകൾ പേറിയവർ 

രാജാവ് വില്ലുകുലയ്ക്കുന്നു 

ഞാനിരുന്ന സിംഹാസനം 

ചുട്ടുപഴുക്കാൻ തുടങ്ങി

എനിയ്ക്കപ്പോൾ

വിശപ്പ്  ഇല്ലായിരുന്നു

പിന്നീടെല്ലാം നിങ്ങളാണ് പറഞ്ഞത് 

പാതിയടഞ്ഞ കണ്ണുകളിലൂടെ 

ഞാൻ നിങ്ങളെയെല്ലാം കണ്ടിരുന്നു

ഒന്നുകൂടി നിങ്ങൾ പറയണം 

എന്താണ് ഇങ്ങനൊക്കെ ഞാൻ 

സ്വപ്നം കാണുന്നത് .

..  ... ...

മണ്ണ് അഥവാ മണൽ

മണ്ണ്  അഥവാ മണൽ 

മുറ്റം നിറയെ വീണു കിടക്കുന്നത്  മണലല്ലേ

ചുറ്റും  പറന്നു കളിയ്ക്കുന്നത് മണ്ണല്ലേ 

ചൂലടിച്ചടിച്ച് മുറ്റത്തു നിന്നും മാറ്റിയതും 

കുഴിച്ചു കുഴിച്ച് കൂനകൂട്ടിയതും മണ്ണുതന്നെ`

മണലാരണ്യത്തിലും കടപ്പുറത്തും 

മണ്ണ് വെറുതേ കൂട്ടിയിരിയ്ക്കുന്നു 

മണ്ണുമാന്തികൾ  കടലും പുഴയും 

മാന്തി കൂട്ടുന്നതും മണ്ണല്ലേ 

മലപൊടിയ്ക്കുന്നതും 

കാട് വെട്ടുന്നതും 

മണ്ണിനായല്ലേ 

ഒരു പിടി മണ്ണല്ലേ  നീ തിന്നത്

പക്ഷേ  വിഴുങ്ങിയത്

ഈ ലോകം തന്നെ.

..   ...     വിശ്വം 

  

ഇടപ്പള്ളി തോട്

ഇടപ്പള്ളി തോട്

ആർക്കും വേണ്ടാതെ 

വീർപ്പുമുട്ടി കിടന്നൊരുതോട് 

നികത്തി ഉപയോഗിച്ചപ്പോൾ 

ആളായി ചോദിയ്ക്കാൻ 

ഒഴുകാനാവാതെ 

പോളയും മാലിന്യങ്ങളും നിറഞ്ഞ് 
ഒരു പുരാവസ്തുപോലെ
ഉറങ്ങുകയായിരുന്നു തോട് 

മാടി കെട്ടിയപ്പോൾ
മേനിയളവുകൾ പരസ്യമായി   

നാപ്പതു മീറ്റർ വീതിയുണ്ടായിരുന്നു 
കെട്ടുവള്ളങ്ങൾ ഉലാത്തിയിരുന്നു   

ഇപ്പോൾ അഞ്ചു കിലോമീറ്ററിൽ

അഞ്ചുമീറ്റർ മാത്രം വീതി 

സ്ഥലകണക്കിൽ അമ്പതേക്കർ പുഴ  

മലയും മണ്ണും കൂടി
തിന്നുതീർത്തിരിയക്കുന്നു 

പണക്കണക്കിൽ പറഞ്ഞാൽ 

അഞ്ഞൂറു കോടി രൂപാ !

ഇടപ്പള്ളി തോട്ടിൽ
ഇനിമുതൽ  

ബോട്ട്  ഓടുമത്രേ.

എല്ലാം വെറുതെ 
പരക്കുന്ന നുണയെന്ന് 
പാവം മുതലാളി 

  ....

സ്നേഹ ജ്വാലകൾ

സ്നേഹ ജ്വാലകൾ

ooooo ooooo ooooo  

കാറ്റത്ത്‌ 

കത്തുന്ന വിളക്ക്

നേരെ നില്ക്കാൻ 

കൊതിയ്ക്കുന്ന 

ഒരു തീനാളമാണ് 

ഏതു നിമിഷവും 

കറുത്ത് 

പുകയാൻ 

വിധിയ്ക്കപെട്ടവൾ   

 ചിരിയ്ക്കും 

കരച്ചിലിനും 

ഇടയിൽപ്പെട്ട  

കൗമാര സ്വപ്‌നങ്ങൾ 

ഇരു കരങ്ങളും കൊണ്ട് 

മാറിലേയ്ക്ക് 

മാറ്റി കൊണ്ടിരിയ്ക്കും  

സമവാക്യങ്ങളിൽ 

കാറ്റും വെളിച്ചവും 

അതിര് കടക്കില്ല  

ആണും പെണ്ണും 

തീയും 

വെള്ളവും പോലെയോ?

കാറ്റേ 

നീ കരുതി വീശുക

ആറ്റുവക്കിൽ 

അരിഞ്ഞാണം 

കാട്ടുതീയും 

പണിതു കൂട്ടുന്നു  

ചുവന്ന കണ്ണുകൾ 

അഞ്ജനം എഴുതി 

തിളപ്പിയ്ക്കണോ 

ഒരു കാറ്റിലും 

വീഴാതെ 

കത്തി നില്ക്കട്ടെ 

സ്നേഹ ജ്വാലകൾ 

....       വിശ്വം 

കിറുകൃത്യം

കിറുകൃത്യം  

അത് അവന്‍ തന്നെയാണ് 

കറുത്ത കോട്ടും 

കണ്ണടയും  വെച്ചിട്ട്

കണ്ടതും 

ഓടുകയായിരുന്നു 

അങ്ങനെ വിടാന്‍ പറ്റുമോ 

പുറകേ  ഓടി

അവന്  കൃത്യമായി 

കിടങ്ങ് അറിയാമായിരുന്നു 

വീണപ്പോള്‍ എനിയ്ക്കും 

അങ്ങനെയാണ് 

കൈയും കാലും ഒടിഞ്ഞത് 

ഇല്ലായിരുന്നെങ്കില്‍ 

കിറുകൃത്യം 

നിങ്ങളും വിശ്വസിച്ചേനെ!

...                .....

രഹസ്യം

രഹസ്യം 

ചില രഹസ്യങ്ങള്‍ 

രഹസ്യമായി തന്നെ 

പരസ്യപ്പെടും 

അത്തരം ഒരു 

രഹസ്യക്കാരിയെയാണ് 

അതിരഹസ്യമായി 

പിടിയ്ക്കപ്പെട്ടത്‌ 

പക്ഷേ  മുഖം 

പരസ്യങ്ങളില്‍ 

കണ്ടു  പരിചയമുള്ളത് 

ഇനി 

ഒരു രഹസ്യം കൂടി പറയാം 

വല വിരിച്ചാല്‍ 

ഇര വീഴുവോളം 

രഹസ്യം  

         ....    

ഒത്തുതീര്‍പ്പ്

ഒത്തുതീര്‍പ്പ്

എല്ലാംമറിയുന്നെങ്കിലുമൊരുപൊടിക്കൈ
എൻപേരിലും കിടക്കട്ടെയടയാളമായ്
ഞെട്ടുമോ ലോകം വെറും തോന്നലാകാം
ഞെട്ടറ്റതെല്ലാമഗ്നിയ്ക്കടിപ്പെടും

സ്വയമേകൊഴിയട്ടേ അരുതെന്ന് ബോധം
വയ്യെന്ന് ദേഹം നരകമാകുന്നു ജീവിതം
പിടിവാശികള്‍ വിട്ടൊരുമിച്ചു നില്‍ക്കുവാന്‍
ദേഹിയ്ക്ക്  സമ്മതം പേറുന്ന ദേഹത്തിനെ

കൊടും കാട്ടിലെങ്കില്‍  വന്യമൃഗങ്ങളോ 
മരുഭൂമിയിലെന്നാലോ  കഴുകകൂട്ടങ്ങളോ
വേര്‍പെടുത്തിടും  ദേഹമേ പോകു നീ
നേരമാകുമ്പോള്‍ നമ്മള്‍ പിരിഞ്ഞോളും

യാത്രയ്ക്കിനിവയ്യ വേറെന്തുപായം
കൂട്ടിനാരെയും  വയ്യല്ലോ ഈരഹസ്യത്തില്‍
തലവെച്ചുനോക്കൂ, പായും തീവണ്ടിമുന്നില്‍
ശിരസറ്റാലുറപ്പ്  നാം പിരിഞ്ഞിരിയ്ക്കും

വയ്യ സങ്കല്പിയ്ക്കുവാന്‍ വെണ്മ ചുവക്കുന്നത്
അല്ലെങ്കില്‍ നാം എന്തിനു മൂന്നായി പിരിയണം
എന്നാല്‍ നിസ്സാരം ചാടിയ്ക്കോ ആഴക്കയങ്ങളില്‍
ഞാന്‍ പോയശേഷം നീ പൊങ്ങിടും`ഉറപ്പായും.

അകെ വീര്‍ത്തു വിറങ്ങലിച്ചുള്ളൊരു കാഴ്ച വേണ്ട
ഒരിയ്ക്കലും  അതിനര്‍ഹനല്ല   ആരായിരുന്നു നീ
എങ്കിലാകാം ഏതെങ്കിലും കൊടുംവിഷം വേര്‍വിട്ടകറ്റും
നമ്മെ  പക്ഷെ കുടിയ്ക്കുമ്പോള്‍ നീ  ചതിയ്ക്കല്ലേ !

ഉറക്കെ ശബ്ദം വന്നാല്‍ എത്തില്ലേ ആള്‍ക്കൂട്ടം
അബദ്ധത്തില്‍ ആരെങ്കിലും മുതിര്‍ന്നാല്‍ തീരില്ലേ
പിരിയാന്‍ ഉറപ്പിച്ചാന്‍ വഴി മാത്രം തേടുക ഒക്കെ
തീരും  നിസ്സാരമായ് ഒരു നീളന്‍ കയര്‍ തുമ്പില്‍ .

ബോധമേ  നീ ബുദ്ധിമാന്‍,  ആരും അറിയാതെ
നമ്മുടെ സ്വപ്നസൌധത്തില്‍ തന്നെ പിരിഞ്ഞിടാം
തര്‍ക്കിക്കുന്നില്ലിനി മുറികള്‍ എല്ലാം അടയ്ക്കുന്നു ഞാന്‍
എഴുതിവെയ്ക്കൂ   നീ നിന്റെ അന്ത്യ കാവ്യക്കുറിപ്പുകള്‍ .
           ..  ..